عدنان صديقي

عدنان صديقي: فلم ۽ ٽي. وي جي ناليواري اداڪار ۽ ماڊل عدنان صديقيءَ، 23 آڪٽوبر 1969ع تي لاهور ۾ جنم ورتو. هن فني زندگيءَ جو آغاز 1988ع ۾ ماڊلنگ ۽ پي. ٽي. وي تان نشر ٿيندڙ ڊرامن ۾ اداڪاري ڪرڻ سان ڪيو. هن پي. ٽي. وي جي: عروسا، پل دوپل، هوا ريت اور آنگن، ميري اڌوري محبت، ڇوٽي سي ڪهاني، آئينا، امرائو جان ادا ۽ مهندي ڊرامن ۾ اداڪاري ڪئي آهي. ان کان سواءِ هن هم ٽي. وي تان نشر ٿيندڙ ڊرامن: ‘پارسا’، ‘ميري جان’، ‘شدت’، ‘دلدار’، ‘پاڪيزه’، ‘سمي’، ‘آهسته آهسته’، ‘ملاقات’ ۽ ‘ڪتنا ستاتي هو’ ۾ ڪردار ادا ڪيا. عدنان صديقيءَ اي. آر. وائي چئنل تان: منزل، ڪيسا يه جنون، سوچا نه ٿا، ديا جلي، اعتراف، درميان وغيره ڊرامن ۾ پنهنجي اداڪاريءَ جا جوهر ڏيکاريا. هن جيو ٽي. وي جي: دوراها، جل پري، صندل، ٿوري سي وفا چاهئي وغيره ڊرامن ۾ اداڪاري ڪئي. عدنان صديقيءَ 2007ع ۾ هالي ووڊ جي فلم ‘A Mighty Heart’ ۾ اينجلينا جولي ۽ ڀارتي اداڪار عرفان خان سان گڏجي ڪم ڪيو. 2016ع ۾ پاڪستاني فلم ‘يلگار’ ۾ ڪرنل عمران جو رول ڪرڻ تي کيس تمام گهڻي پذيرائي ملي. ان کان سواءِ هي 2017ع ۾ ڀارت ۾ ٺهندڙ فلم ‘Mom’ ۾ اداڪاره سري ديويءَ سان اهم رول ۾ نظر آيو. ان فلم ۾ پاڪستان جي ناليواري اداڪاره سجل علي سندس ڌيءَ جو ڪردار ادا ڪيو آهي. عدنان صديقيءَ جو فني سفر جاري آهي. هيءُ هن وقت ڪراچيءَ ۾ رهي ٿو.

داخلا ۾ استعمال ٿيل تاريخون

1969.10.23  عيسوي

فلم ۽ ٽي. وي جي ناليواري اداڪار ۽ ماڊل عدنان صديقيءَ، 23 آڪٽوبر 1969ع تي لاهور ۾ جنم ورتو.

شخصيتون - ڀاڱي جون ٻِيون داخلائون